|
Amdanom
Ni
Mae gan
Eglwys Bresbyteraidd Cymru dros 30,000 o aelodau a mwy na 700 o
eglwysi ar hyd a lled Cymru, yn ogystal â chysylltiadau ag eglwysi
dramor.
Amcanion
Ein
hamcan yw addoli Duw a lledaenu Efengyl yr Arglwydd Iesu Grist.
Ceisiwn
wneud hyn drwy bregethu’r Efengyl, gweinyddu’r sacramentau a gweddïo.
Darparwn fugeiliaeth eglwysig, yn ogystal ag addysg Feiblaidd. Rydym
yn ymgymryd â gwaith cenhadol gartref a thramor a phwysleisiwn yr
angen i fod yn weithgar ac i roi esiampl o fywyd Cristnogol da.
Safwn o
blaid cyfiawnder a heddwch yn ein byd a gwnawn ein gorau i warchod
ein hamgylchedd.
Hanes
Am wybodaeth ynglŷn â hanes yr Eglwys, gweler
yr
Adran Hanes.
Strwythur
Mae pob
eglwys o fewn Eglwys Bresbyteraidd Cymru yn atebol i henaduriaeth,
corff rhanbarthol sydd yn cyfarfod yn chwarterol. Mae 14 o henaduriaethau
ac mae pob un yn gyfrifol
am gynllunio’r gwaith gweinidogaethol a chenhadol o fewn ei ffiniau.
Yn ogystal, gall alw gweinidogion, ordeinio blaenoriaid ac arolygu
gwaith yr Ysgolion Sul a’r ieuenctid.
Mae’r
henaduriaethau wedi eu rhannu yn dair cymdeithfa: y
Gymdeithasfa yn y De, y Gymdeithasfa yn y Dwyrain a’r
Gymdeithasfa yn y Gogledd. Maent yn cyfarfod tua dwywaith y
flwyddyn er mwyn arolygu a chadarnhau gwaith yr henaduriaethau. Y
cymdeithasfeydd sydd hefyd yn gyfrifol am ordeinio gweinidogion.
Canolbwynt blwyddyn Eglwys Bresbyteraidd Cymru
yw’r
Gymanfa Gyffredinol,
sy’n cael ei chynnal am dridiau ym mis Medi (o 2008 ymlaen). Mae gan
y Gymanfa Gyffredinol
Lywydd
sy’n cael ei ethol yn flynyddol.
Mae tri bwrdd o fewn y Gymanfa Gyffredinol:
Bwrdd y Gymanfa Gyffredinol,
y
Bwrdd Bywyd a Thystiolaeth
a’r
Bwrdd Adnoddau.
Mae nifer o adrannau a phaneli ym mhob bwrdd, a phob un yn gyfrifol
am agwedd o fywyd a gwaith yr Eglwys.
Lleolir
Swyddfa Ganolog
Eglwys Bresbyteraidd Cymru yng Nghaerdydd. Staff y Swyddfa sydd yn
gyfrifol am weinyddiaeth yr Eglwys. Fe’i rheolir gan yr
Ysgrifennydd Cyffredinol, sydd yn atebol i’r Gymanfa Gyffredinol.
Ein Heglwysi
I
gael mwy o wybodaeth ynglŷn â’ch heglwys leol,
cysylltwch â’r
Swyddfa.
Mae gan
rai o’n heglwysi eu
gwefan
eu hunain.
Cyflwyniad "Dyma'r
Cyfundeb"
Am fwy o wybodaeth ynglŷn
â'n cred a'n gwaith, gallwch lawrlwytho ein cyflwyniad PowerPoint "Dyma'r
Cyfundeb" (.PPT, 30,243KB) |
