Hafan

 Y Swyddfa

 Y Cyfundeb

 Newyddion

 Canolfannau

 Dogfennau

 Cyhoeddiadau

 Ariannol

 Eiddo

 Dolenni

	Papur Wythnosol Eglwys Bresbyteraidd Cymru

Dathlu pen blwydd yn Singapore

Ddiwedd mis Tachwedd y llynedd cynhal­iwyd ymgynghoriad yn Singapore ar achlysur dathlu pen-blwydd y Cyngor Cenhadu Byd-eang (CWM) yn 30 oed. Fel rhan annatod o’r dathlu aethpwyd ati i ystyried rhawd a datblygiad CWM dros y deg mlynedd ar hugain diwethaf a’r weledigaeth ar gyfer y dyfodol.

  I baratoi ar gyfer yr ymgynghoriad lluniodd Ysgrifennydd Cyffredinol CWM, y Parchg Ddr Des van der Water, adroddiad yn esbonio’r weledigaeth wreiddiol (Work in progress or mission accomplished?), gan geisio canfod i ba raddau y llwyddwyd i’w gwireddu a beth oedd oblygiadau bod yn driw i’r weledigaeth honno i’r dyfodol.

  Tarddodd y weledigaeth o’r sylweddoliad ganol y saithdegau nad priodol nac ymarferol bellach oedd i wledydd Gogledd America a Gorllewin Ewrop anfon cenhadon i efengylu’r byd ‘paganaidd’ yn yr un modd ag a wnaed gynt. Roedd eglwysi ifanc y byd, sef ffrwyth y genhadaeth dros y ddwy ganrif flaenorol, wedi dod i’w hoed ac eisiau i’w priod lais gael ei glywed. Y canlyniad oedd pwyslais cenhadol newydd ar bartneriaeth, cydweithio, parch eglwysi at ei gilydd, cydraddoldeb, rhannu pobl ac adnoddau a’r sylweddoliad fod y byd oll yn faes cenhadol. Un ffordd y mynegwyd y weledigaeth newydd hon oedd drwy ddelwedd y bwrdd crwn lle’r eistedd pawb cyfuwch â’i gilydd. Pwysleisiwyd hefyd natur holistaidd cenhadaeth a daliwyd gafael ar yr egwyddor ecwmenaidd a fynnai nad oedd gan hunan-dyb a thrahauster enwadol le o gwbl mewn cenhadaeth.

  Yn ei adroddiad dywed Des van der Water i eglwysi CWM lwyddo i wireddu’r weledigaeth i raddau helaeth iawn dros y deg mlynedd ar hugain diwethaf. Nid oedd oblygiadau gwneud hynny’n eglur i bawb ar y dechrau, meddai, ac yr oedd yn anochel fod y fenter yn ymdebygu rywfaint i brynu cath mewn cwd! Ond yn ôl yr Athro Stephen De Gruchy o Dde Affrica, fynychodd y gynhadledd yn Singapore fel ymgyng­horydd diwinyddol, bu’r newidiadau a welwyd o fewn CWM o ran pwy sy’n gwneud penderfyniadau, cefndir y cenhad­on, y gwaith a gyflawnir a’r berthynas rhwng eglwysi hemisffer y de â’i gilydd, yn brawf pendant fod y mudiad wedi tyfu a datblygu.

  Ond y cwestiwn mawr yn Singapore oedd a yw’r weledigaeth oedd mor newydd a gwefreiddiol yn 1977, yn addas ar gyfer y dyfodol? Er gwaethaf y newidiadau enfawr welwyd mewn byd ac eglwys, a’r sylweddoliad fod yn rhaid i’r weledigaeth gael ei mynegi mewn ffyrdd newydd ac addas ar gyfer y byd cyfoes, dal gafael arni wnaeth y cynadleddwyr gan ail bwysleisio’r cymhellion a’r agwedd meddwl roddodd fod i CWM. Mynegwyd hynny yn y datganiad sy’n dilyn, ac yr wyf yn ddiolchgar i’r Parchg Ddr Geraint Tudur, am ei gyfieithu.

  Y mae’r datganiad yn mynegi sawl pwys­lais ddaeth yn amlwg iawn yn Singapore ac un o’r amlycaf ohonynt  leisiwyd yn groyw gan gynrychiolwyr o Affrica, oedd yr angen i’r Eglwys weithio o blaid cyfiawnder economaidd a chymdei­thasol. Heb geisio gweithredu egwyddorion y Ffydd yn y cyd-destun hwnnw, meddent, anghyflawn ac aneffeithiol fydd  ein cenhadaeth.

Dr. Elwyn Richards

Partneriaid Mewn Cenhadaeth:

Yr Ymdrech a’r Addewid Ymgynghoriad Cenhadol

30ain Penblwydd CWM, Singapore, Tachwedd 20-25, 2007

Daeth Ymgynghoriad Cenhadol degfed-ar-hugain pen-blwydd CWM a 60 o gynrychiolwyr ynghyd o’r eglwysi sy’n perthyn i CWM ac o blith ei bartneriaid eciwmenaidd, a hynny i ddathlu ac i fyfyrio ar yr ymdrech a’r addewid sy’n gysylltiedig â gwaith CWM. Daethom at ein gilydd yn Singapore ar 20-25 Tachwedd 2007 fel gwesteion Eglwys Bresbyteraidd Singapore.

  CWM yw olynydd Cymdeithas Genhadol Llundain, Cymdeithas Genhadol y Gyman­wlad a Phwyllgor Cenhadaeth Dramor y Presbyteriaid.

  Gan adeiladu ar waith cenhadol arloesol y gorffennol, sefydlwyd CWM yn 1977 fel ffordd newydd o feddwl a gweithredu mewn cenhadaeth. Mewn ymateb i’r her o gyfnod newydd mewn cenhadaeth fyd-eang, ac mewn ufudd-dod i gymhellion yr Ysbryd Glân, sefydlwyd y bartneriaeth newydd hon mewn cenhadaeth gyda phwyslais ar gyd-dynnu, cydraddoldeb a rhannu.

  Wrth galon hunaniaeth CWM mae perthynas gyfamodol y mae’r holl bartner­iaid yn ymroi o’i mewn i rannu eu hadnoddau cenhadol boed yn ddynol, yn ariannol neu yn ddeallusol.

  Yr ydym yn dathlu’r bartneriaeth ddeg-ar-hugain oed hon sy’n cael ei chynnal trwy ein ffydd gyffredin yn Iesu Grist gan geisio gwireddu’r weledigaeth o symudiad cenhadol ‘o bobman i bobman’. Yr ydym wedi rhannu straeon,

• am gynnydd yr ymdeimlad o bartneriaeth mewn cenhadaeth

• am ysgogi datblygiad mewn arweinydd­iaeth ymhlith lleygwyr a gweinidogion, hen ac ifanc, gwragedd a dynion

• am ledu a dwysáu ein cydweithrediad eciwmenaidd

• am sicrhau ymwneud cynyddol ag amrywiol ddiwylliannau, ieithoedd a chyd-destunau

• am hyrwyddo dealltwriaeth holistig o weithgarwch cenhadol

• am gyd-dynnu â phobl o argyhoeddiadau crefyddol a dirnadaethau byd-eang gwahanol

• am harneisio doniau, sgiliau a phrofiad pobl

• am wneud y gorau o’r adnoddau ariannol yr ydym yn eu meddu ar y cyd

Yr ydym yn dathlu’r gorffennol gan gydnabod ein bod yn parhau ar bererindod ffydd a datblygiad yn y dasg o genhadu. Gan roi sylw i straeon a phrofiadau’r rhai hynny o bobl Dduw sy’n ymwneud â chenhadaeth, yr ydym yn ymdrechu i ganfod y ffordd ymlaen gan barhau i dynnu ar addewidion gras wrth i ni geisio byw ein gweledigaeth o bartneriaeth a gwireddu ein hamcanion.

  Yr ydym yn cydnabod ein bod yn bartneriaid mewn cenhadaeth fyd-eang sy’n cynnwys elfennau o barhad ac ymwrthod â sefyllfa’r byd ddeng mlynedd ar hugain yn ôl. Mae’n ofynnol i ni felly ddirnad ac ail-ddirnad ‘arwyddion yr amserau’.

  Yr ydym yn byw mewn byd sy’n cael ei reoli gan ddyheadau ymerodraethol a chan broses globaleiddio dilyffethair lle ceir cyfoeth aruthrol a thlodi enbyd, byd sy’n wynebu effeithiau anghyfiawnder, newid hinsawdd, HIV ac AIDS, tyndra crefyddol ac ethnig; byd y mae lleisiau pobl yn cael eu tawelu ynddo trwy drais, trwy rym a thrwy orfodaeth, a byd y mae’r hyder yng ngallu’r sefydliadau byd-eang i sicrhau diogelwch, cyd-ddealltwriaeth a heddwch yn cilio ynddo.

  Yn wyneb y sialensiau hyn, ac mewn byd lle mae pechod a drygioni yn weithredol, cydnabyddwn yr angen i barhau i gyflwyno tystiolaeth broffwydol gan gynnig presen­oldeb bugeiliol a gweinidogaeth ymarferol offeiriadol wrth barhau gyda’n gweith­garwch cenhadol.

  Fel partneriaeth a chymuned o eglwysi mewn cenhadaeth, yr ydym felly’n ymroi o’r newydd,

• i addoli’r Duw Trindodaidd sy’n cynrych­ioli ac yn ymgorffori’r gym­deithas yr ydym yn tystio iddi

• i barhau yn ein galwedigaeth genhadol i fod yn bartneriaid yng nghenhadaeth Duw mewn ymateb i’w ras achubol fel y’i datgelwyd i ni yn Iesu Grist

• i ddarllen y Beibl mewn ffyrdd newydd er mwyn canfod patrymau newydd o ymwneud â chenhadaeth

• i fod yn agored i waith trawsffurfiol yr Ysbryd Glân ym mywydau pawb sy’n credu

• i alw pobl i ffydd a chyflawnder bywyd yn Iesu Grist

• i weithio a gweddïo dros adferiad a chymod, cyfiawnder a heddwch

• i gryfhau ein hundod er ein hamrywiaeth, gan hyrwyddo cyd-dynnu, cydraddoldeb, a pharch, a rhannu grym mewn tegwch

• i roi blaenoriaeth i’r cyd-destun lleol wrth ystyried a chyflawni cenhadaeth

• i ddwysau ein cymdeithas, ein partner­iaeth a’n hymwneud â’r eglwys fyd-eang a’r gymuned eciwmenaidd

• i ddysgu trwy wrando ar leisiau heblaw ein rhai ni ein hunain

• i ymdrechu fwyfwy er mwyn galluogi gwragedd, ieuenctid a phlant

• i barhau i rannu adnoddau dynol, ysbrydol, materol ac ariannol

• i gynnal y dystiolaeth broffwydol a’n cadernid bugeiliol yn wyneb systemau a strwythurau gormesol

• i ysgwyddo ychwaneg o gyfrifoldeb yn ein gofal dros y cread

Ar achlysur y dathliad hwn, yr ydym felly yn hyderus yn datgan ein hymroddiad gyda’n gilydd o fewn CWM i’r dasg amlochrog o genhadu mewn byd sydd mewn angen cyson am ras, cariad, cyfiawnder a heddwch Duw.

  Fel partneriaid â Duw yr ydym yn parhau’r daith genhadol gyda diolchgarwch, gostyngeiddrwydd a gobaith.

Rhai o’r Cynadleddwyr

Yn ôl i dudalen Y Goleuad

English