Bywyd a Thystiolaeth yn Henaduriaeth y Gogledd

Mae Mrs Heather Staniland wedi dechrau ei swydd newydd fel Swyddog Hyfforddi a Datblygu rhan-amser yn Henaduriaeth y Gogledd. Bydd Mrs Staniland yn cynnig cymorth gyda'r cyfleon hyfforddi sydd ar gael i'r eglwysi a bydd hefyd yn helpu i ddatblygu partneriaethau rhwng eglwysi a mudiadau cymunedol a gwirfoddol. Fel rhan o alwad i wasanaethu o fewn 'eglwys heb furiau', mae'r swydd newydd hon yn cynnig cyfle pwysig i genhadu.

Mae gan Mrs Staniland radd mewn diwinyddiaeth o Brifysgol Manceinion a bu'n athrawes Addysg Grefyddol mewn ysgol uwchradd yng Nghaer.

Diolch i Mr Mervyn Philips

 

Camau newydd tuag at gydweithio yn Wrecsam

Fasech chi wedi disgwyl gweld Esgob Anglicanaidd ochr yn ochr â Llywydd Henaduriaeth yn sefydlu Anglican yn offeiriad ac yn weinidog Presbyteraidd mewn capel Presbyteraidd?

Do, mewn gorymdaith i arwyddo eu hundod fe gydgerddodd Esgob Llanelwy, y Gwir Barchedig John S. Davies, gydag offeiriadon cylch Wrecsam, Llywydd Henaduriaeth y Gogledd, y Parch. Neil Kirkham a gweinidogion Presbyteraidd ac eraill, o Eglwys y Drindod Sanctaidd i Gapel y Tabernacl, Rhostyllen.  Yno roedd cynulleidfa gref i sefydlu’r Parch. Gary Windon yn weinidog i’r ddwy Eglwys a’u galluogi i wasanaethu’r gymuned gyfan gyda’i gilydd.  Bydd hefyd yn Gaplan yn Hosbis Tŷ’r Eos.

Blaen: Esgob Llanelwy, Parch Gary Windon, Parch Brian Matthews a Llywydd yr Henaduriaeth, Parch Neil Kirkham. Cefn: Llywydd y Gymdeithasfa, Parch David Jenkins, Ysgrifennydd yr Henaduriaeth, Mrs Margaret Jones, Archddeiacon Squires, Canon Geoffrey Marshall, Parch Dafydd Andrew Jones, Mervyn Phillips a Chadeirydd yr Hosbis, Norman Land.

Doedd trefn y gwasanaeth nag yn Anglicanaidd nac yn Bresbyteraidd ond yn hytrach yn blethiad o’r ddau draddodiad mewn litwrgi a roddai ran i’r gynulleidfa gyfan, i unigolion  ddarllen a gweddïo a’r gweinidog newydd benlinio o flaen yr Esgob i’w drwyddedu, Llywydd yr Henaduriaeth i’w sefydlu a Chyfarwyddwr Bwrdd Bywyd a Thystiolaeth i’w gomisiynu.  Pregethodd Llywydd y Sasiwn.  Ar y diwedd a phawb mewn hwyliau ac undod yn cwmnïa yn rhadlon, dyma fwynhau llafur y chwiorydd. 

Dyma noson i’w chofio am nifer o resymau:

• Mae’n dangos beth sy’n bosib pan fo awydd a brwdfrydedd i fentro.  Doedd gweinidogaeth i’r ddwy eglwys ddim yn bosib heb iddynt berthyn ar wahân i ofalaethau aml-eglwysig a fyddai o bosib yn aneffeithiol a heb y dimensiwn cymunedol.  Dyma ymdrech i wneud rhywbeth newydd a hynny gyda chefnogaeth arweinwyr yr eglwysi.  Priodol iawn yw nodi’n arbennig ymroddiad a chadernid yr Esgob wrth ddymuno y gwasanaeth unedig yn y capel.
• Ffocws yr uniad yw’r gymuned gyfan.  Oddi mewn i’r ffocws y mae’r her oblegid bydd yn rhaid holi am addoliad a’i ffurf, adeiladau a defnydd ohonynt a pherthyn – i bwy?  Allan o’r strygl yna bydd tyfiant mewn ffydd, gobaith a chariad; tyfiant pobl Dduw ynddo Ef ac i’w gilydd mewn gwasanaeth a thystiolaeth.
• Roedd ysbryd y noson drwyddi draw yn gynhesol, cyfeillgar a Christ-debyg: roedd cyffro’r ysbryd yn chwalu unrhyw ddieithrwch a chreu agosatrwydd ac undod nes peri’r teimlad mai da iawn oedd i ni fod yno a bod rhywbeth cyffrous yn digwydd yma.
• Roedd yn gychwyn da i fenter newydd.  Mae Gary Windon, ar ei gyfaddefiad yn y gwasanaeth,  yn fyw i ofynion y fenter os yw i lwyddo.  Bydded i gadernid a brwdfrydedd Amen y gynulleidfa barhau i’w hysgogi gyda phenderfyniad diwyro i oresgyn a llwyddo.

Ond y mae mwy i’w ddweud.  Tydi eciwmeniaeth ddim yn fawr; yn wir gall fod y rhan helaethaf o’n gobaith wrth i’n cyfundrefnau ddihoeni (a darfod?).  Nid polisïau na strategaethau canolog sy’n bwysig ond yn hytrach awydd Cristnogion lleol (y gweddill ffyddlon) i ddiogelu’r dystiolaeth Gristnogol yn eu bro a’u cymuned nhw ac felly ddod at ei gilydd o wahanol draddodiadau i ffurfio cnewyllyn a chychwyn newydd.

Does dim rhinwedd mewn diogelu traddodiad na chadw adeilad pan fo’r ffydd ei hun dan fygwth yn ein cymunedau.  Braint y cyfundrefnau fydd cefnogi a hyrwyddo bwriadau y lleol. 

A sôn am gymuned a chymunedau, beth am y storm sy’n amgylchynu Cyngor Sir Gwynedd ynglŷn â chau ysgolion.  O gofio mai ffydd gymunedol yw’r ffydd Gristnogol yn ei hanfod, tybed na ddylem fod yn sôn mwy am gau adeiladau o bob math er mwyn buddsoddi mewn rhai newydd aml-bwrpas ar gyfer cymuned gyfan a’i hanghenion.

Parch Dafydd Andrew Jones