|
Partïon arbennig yn
Llanfairpwll
Ni fu erioed gymaint o ddathlu
penblwyddi gyda’i gilydd ag a fu yn Eglwys Unedig Rhos y Gad
Llanfairpwll yn ddiweddar. A rheiny yn benblwyddi arbennig iawn. Yn
ystod mis Chwefror dathlodd tri o’r aelodau gyfanswm o ddau gant
saith deg o flynyddoedd rhyngddynt! Ar ddechrau’r mis bach roedd Mrs
Grace Roberts yn dathlu ei phenblwydd yn 90 oed ac wedyn Mr Bleddyn
Williams yn dathlu ei 80. Gan eu bod eu dau yn aelodau selog o
ddosbarth Ysgol Sul yr oedolion, ( y ddau wedi cael y Fedal Gee)
cafwyd parti a the a chacen arbennig yng nghwmni’r gweinidog, Y
Parchedig Jim Clarke. Yna, yn goron ar y cyfan, roedd Mrs Rhiannon
Jones yn dathlu ei phenblwydd yn 100 oed.
Mae’r tri yn ffyddlon iawn i’r
oedfaon. Yn ystod yr wythnosau cyn y Nadolig, oherwydd gwaith
adeiladu, nid oedd system gwresogi yn y capel, ond ni chlywyd yr un
o’r tri yn cwyno unwaith nac yn colli oedfa. Cynhaliwyd parti gan
Gymdeithas y Chwiorydd hefyd er mwyn llongyfarch a dymuno’n dda i’r
ddwy wraig. Tynnwyd lluniau wrth fwrdd bwyd hardd iawn ac arno ddwy
deisen penblwydd — un â 90 arni a’r llal â’r rhif 100! Yn holl hanes
hir eglwys Rhos y Gad dyma’r tro cyntaf i aelod gyrraedd y cant oed,
a’r bore Sul, trannoeth y dathliad teuluol, cafodd cynulleidfa’r
bore guro dwylo a chanu ‘Penblwydd Hapus’ i Mrs Jones. Cyflwynodd y
gweinidog fasged o flodau iddi gyda dymuniadau da’r gynulleidfa oll.
A thynnu mwy o luniau!
Cafodd un o’r aelodau, Mrs Wenna
Williams, gyfle i gael sgwrs â Mrs Jones ar gyfer y Papur Bro.
Disgrifiodd hi fel gwraig fywiog ei hysbryd; ei chof yn ddiball a’i
hatgofion yn fyrlymus ddifyr. Soniodd am ei dyddiau cynnar ym Mhen y
Bryn, Rhosgadfan, ond yn Llanfairpwll y mae Mrs Jones yn byw bellach
ers 14 mlynedd. Mae ei chartref fel nyth bach clyd ac o’i chwmpas
enghreifftiau o’i gwaith llaw cain. Er nad yw ei golwg yn ddigon da
iddi allu gwnïo bellach, mae’n dal i grosio. A’r bore Sul nesaf ac
am lawer bore Sul i ddod hyderir y gwelir Mrs Jones a’i ffrind
cywir Mrs Grace Roberts ac yntau Mr Bleddyn Williams yn eistedd yn
eu seddau yng nghapel Rhos y Gad.
Mr Alwyn
Pleming |
