Galw am etholiadau teg yn Zimbabwe

Mae arweinyddion Eglwys Bresbyteraidd Cymru wedi galw ar Gymuned Ddatblygu Deheudir Affrica (CDDA ­ Southern African Development Community) i ddwysáu ei hymdrechion i sicrhau bod etholiad teg yn cael ei chynnal yn Zimbabwe, lle bydd ail rownd yr etholiad arlywyddol yn cael ei chynnal ar 27 Mehefin.

Mae deuddeg o arweinyddion eglwysig Prydeinig wedi ysgrifennu at Arlywydd Levy Mwanawasa o Zambia, sef llywydd y CDDA, gan fynegi eu pryder dwfn ynglŷn â’r sefyllfa, sy’n mynd o ddrwg i waeth. Mae Llywydd ac Ysgrifennydd Cyffredinol Eglwys Bresbyteraidd Cymru wedi datgan eu cefnogaeth lwyr i’r neges.

“Mae pleidleiswyr yn cael eu bygwth a’u harteithio,” meddai’r Llywydd, y Parchedig John Owen “ac mae grwpiau hawliau dynol yn dweud bod dwsinau o bobl wedi cael eu lladd.”

“Rwy’n bryderus iawn bod hyn yn gwneud cynnal etholiad teg yn amhosible. Rwy’n cymell y CDDA i wneud popeth o fewn ei gallu i helpu pobl Zimbabwe i roi diwedd ar y trais a’r bygythiadau.”

Er y trafferthion economaidd dybryd yn Zimbabwe, mae’r llywodraeth wedi gorchymyn asiantaethau dyngarol i roi’r gorau i bob ymgyrch ddyngarol. Nid yw grwpiau sy’n agored i newid, megis plant amddifad, pobl anabl, pobl sydd â HIV ac AIDS a phobl oedrannus, bellach yn derbyn cymorth bwyd.

“Mae’n sefyllfa mor drist” meddai Lyn Eltringham, blaenor yn eglwys Stow Park, Casnewydd, a fu’n byw yn Zimbabwe am ddeg mlynedd ar hungain. “Cafodd fy mhlant eu geni yn Zimbabwe. Dwi’n meddwl bod yn rhaid i chi fod wedi adnabod y wlad cynt i allu deall gymaint mae pethau wedi gwaethygu.”

“Allwn ni ddim ond gweddïo y bydd pethau’n gwella.”

Mae Cyngor Eglwysi’r Byd wedi galw ar i bob Cristion i weddïo dros Zimbabwe ar ddydd Sul, 22 Mehefin 2008. 

“Rydym yn galw ar ein haelodau i gofio am Zimbabwe wrth weddïo dydd Sul a bob dydd wythnos nesaf” meddai’r Parchedig Ifan Roberts, Ysgrifennydd Cyffredinol Eglwys Bresbyteraidd Cymru.