Llyfrau yn siomi Llywydd

Mae Llywydd Eglwys Bresbyteraidd Cymru wedi ei siomi’n fawr gan gyfres o lyfrau sy’n sôn am grefyddau’r byd.

Yn ôl y Parchedig John Owen, nid yw’r traddodiad ymneilltuol Cristnogol yn cael unrhyw sylw yng nghyfres newydd Tania ap Siôn, Crefyddau’r Byd Heddiw.

“Mae pump o’r cyfrolau yn sôn am wahanol grefyddau” meddai. “Mae un yn canolbwyntio ar yr Eglwys Uniongred a’r olaf ar Anglicaniaeth – Eglwys y Plwyf.  Ond nid oes sôn am ymneilltuaeth.”

“Mae’r gyfres yn rhoi’r argraff mai’r Eglwys yng Nghymru yw’r unig eglwys yng Nghymru ac yn y plwyf.”

Mewn llythyr i’r Cymro, cwestiyna’r Parchedig Owen y teitl “Eglwys y Plwyf”, gan nodi nad oes y fath beth ag “eglwys y plwyf” yng Nghymru ers y Datgysylltiad ym 1920.

I weld y stori a'r llythyr yn Y Cymro, cliciwch yma (PDF, 131KB)

Yn ôl adroddiad diweddar, 33% o gynulleidfaoedd Cristnogol Cymru sy’n perthyn i’r traddodiad Anglicanaidd. Mae tua hanner y cynulleidfaoedd yn perthyn i un o’r enwadau ymneilltuol.

“Rwy’n deall bod angen rhoi darlun realistig o fywyd Cristion yn hytrach na darlun cyffredinol o’r enwadau” meddai. “Ac mae’n debyg bod y diffyg sôn am ymneilltuaeth yn deillio o ddiffyg arian.”

“Ond rwy’n deall bod yr Eglwys yng Nghymru yn darparu ar gyfer yr ysgolion sy’n perthyn iddi. Felly onid oes mwy o reswm dros gynhyrchu llyfryn yn cyflwyno ymneuilltuaeth Cymru yn ogystal â’r traddodiadau eraill?”