Neli Jones, Ponrhydfendigaid: Urdd Derwydd er Anrhydedd (Y Wisg Wen). Ar gyfrif gwasanaeth maith ac arbennig i'r Orsedd a'r Eisteddfod.

John Gwynfor Jones, Caerdydd: Urdd Derwydd (y Wisg Wen). Cyhoeddodd eisoes nifer helaeth o gyfrolau ac erthyglau gan sefydlu ei le yn brif awdurdod yn ei faes yn hanes Cymru. Bu'n hybu, dysgu a chyfarwyddo myfyrwyr drwy gyfrwng y Gymraeg, gan ledu'r egwyddor honno i faes arholiadau'r ysgolion. Bu hefyd yn ymroddedig iawn ym mywyd diwylliannol a chrefyddol Caerdydd ers dros ddeugain mlynedd.

John Glyn Jones, Dinbych: Urdd Derwydd (Y Wisg Wen). Bu ei gyfraniad i ddiwylliant Cymraeg ardal Dinbych yn eithriadol. Ar wahân i'w lwyddiant fel Prif Weithredwr Cymdeithas Tai Clwyd, a'i wasanaeth fel Ynad Heddwch, y mae'n fardd o safon genedlaethol, ac yn un o swyddogion Barddas. Mae'n arweinydd tîm y Talwrn â thîm y papur bro, ac yn gyfrannwr ymroddgar ym myd iaith a chrefydd a gwleidyddiaeth.

Dewi Morris Jones, Bronant: Urdd Ofydd er Anrhydedd (Y Wisg Werdd). Rhoddodd oes o wasanaeth fel golygydd proffesiynol gan olygu cannoedd o deipysgrifau a'u llywio drwy'r wasg. Y mae hwn yn waith creadigol sy'n gofyn am grebwyll llenyddol yn ogystal â manylder technegol. Y mae'n ŵr o ddiwylliant eang, yn rhugl ei Lydaweg a'i Ffrangeg, ac yn ymroddgar yn ei wasanaeth i'w gymuned yn ei fro.

Sidney Davies, Glyn Ceiriog: Urdd Ofydd er Anrhydedd (Y Wisg Werdd). Gwraig gampus i'w chymdogaeth. Wedi priodi Theo Davies o Lyn Ceiriog ymsefydlodd yn y dyffryn gan gyfrannu'n gyfoethog iawn at fywyd masnachol a chrefyddol a diwylliannol y fro ar hyd yr hanner canrif y mae wedi bod yno. Ym mhob gweithgaredd o bwys yn y rhan hon o Gymru mae ganddi hi ryw gyfran allweddol.