Angen Rhoi Blaenoriaeth i Gymru 

Dylid rhoi blaenoriaeth i ardaloedd tlawd fel Cymru yn ystod yr argyfwng economaidd, yn ôl arweinwyr Eglwys Bresbyteraidd Cymru.

Mewn llythyr i’r Prif Weinidog, Gordon Brown, mae’r Eglwys yn pwyso ar lywodraeth Prydain i sicrhau bod ei pholisïau wedi eu hanelu tuag at y bobl dlotaf yn y rhannau tlotaf o’r Deyrnas Unedig.

“Mae ystadegau, gan gynnwys rhai diweithdra, yn dangos bod pobl Cymru eto ymysg y rhai sydd wedi eu bwrw galetaf,” meddai Mervyn Phillips, Cadeirydd Adran Eglwys a Chymdeithas yr Eglwys. “Wrth i’r llywodraeth ddatblygu rhaglenni i daclo’r argyfwng economaidd, hoffem eu gweld yn rhoi blaenoriaeth eglur i’r ardaloedd mwyaf anghenus. Rydym yn awyddus iawn i weld y rhaglenni y mae’r llywodraeth yn eu cynnig yn cael eu gweithredu yn sydyn ac mewn ffordd sy’n berthnasol i’r ardaloedd a’r teuluoedd mwyaf bregus.”

Daw’r llythyr ar ddiwedd wythnos o ddiswyddiadau pellach yng Nghymru. Mae ystadegau diweddar yn awgrymu bod diweithdra wedi cynyddu mwy yng Nghymru nag yn unrhyw ran arall o’r DU. Roedd 24,000 yn fwy o bobl yn ddiwaith ym mis Medi o’i gymharu â mis Gorffennaf. Awgrymodd arolwg diweddar y bydd un allan o bob pum busnes yng ngogledd Cymru wedi mynd i’r wal ymhen blwyddyn.

Mae’r llywodraeth eisoes wedi cymryd rhai camau tuag at gefnogi teuluoedd, gan addo cymorth gyda thalu morgeisi i’r rhai sy’n wynebu trafferthion. “Rydym yn gwerthfawrogi’r camau sydd eisoes wedi eu cymryd a’r flaenoriaeth a roddwyd yn y rhaglen ddeddfu i adnewyddiad economaidd,” meddai Mervyn Phillips. “Ond mae’n rhaid targedu’r ardaloedd tlotaf, ac rydym yn gobeithio y bydd y camau sydd eisoes wedi eu cymryd yn sail i raglen fydd yn gwella hyder ac yn rhoi blaenoriaeth glir i anghenion pobl dlawd a bregus."

Yn ôl y Parchedig Ifan Roberts, Ysgrifennydd Cyffredinol Eglwys Bresbyteraidd Cymru, mae cydweithredu rhwng llywodraeth ar bob lefel yn hollbwysig ar adeg fel hon.

"Yn yr argyfwng hwn, bydd y llywodraeth ddatganoledig yng Nghymru yn cydweithio’n agos ag adrannau’r llywodraeth yn San Steffan, a byddwn ninnau hefyd yn ysgrifennu at Brif Weinidog Cymru,” meddai. “Mae mwy o newyddion am golli swyddi bob dydd, felly nawr yw’r amser i roi dadleuon gwleidyddol o’r neilltu a chymryd camau eofn i helpu’r degau o filoedd o Gymry sydd wedi eu heffeithio gan yr argyfwng. Byddwn yn annog Llywodraeth Cynulliad Cymru i bwyso ar Lywodraeth y DU fel bod blaenoriaeth yn cael ei rhoi i ardaloedd tlotaf Cymru. Fel cefnogwyr yr ymgyrch Church Action on Poverty, credwn nad nawr yw’r amser i anghofio am y rhai sydd mewn dirfawr angen.”