G20: Eglwysi yn gwrthod yr hen drefn

Mae ffigyrau blaenllaw o dair ar ddeg o eglwysi Prydain wedi dweud wrth Gordon Brown ac arweinyddion gwledydd y G20 bod yn rhaid ail-feddwl ynglŷn â strwythurau economaidd byd-eang wrth i’r G20 gyfarfod i drafod eu hymateb i’r argyfwng economaidd byd-eang yn Llundain yr wythnos hon.

Mae’r arweinyddion eglwysig, yn cynnwys y Parchedig Ifan Roberts, Ysgrifennydd Cyffredinol Eglwys Bresbyteraidd Cymru, wedi arwyddo datganiad a anfonwyd i’r Prif Weinidog, Gordon Brown. 

Dywedodd y Parchedig Roberts: “Rydym ni fel eglwysi wedi cael cyfle i adlewyrchu, yn ddiwinyddol ac yn ymarferol, ar achosion a sgîl-effeithiau yr argyfwng economaidd byd-eang dros y misoedd diwethaf, ac rydym yn teimlo bod gennym gyfraniad pwysig i’w wneud i’r ddadl.

“Mae ein datganiad wedi ei seilio ar y syniad bod cwymp y marchnadoedd dros y misoedd diwethaf wedi ei achosi gan fethiant moesol. O ganlyniad, mae’r argyfwng yn galw am ymateb moesol. Rydym yn gwrthod unrhyw ateb sydd wedi ei seilio ar yr hen egwyddorion, gan y byddai hynny yn golygu dychwelyd at arferion economaidd a busnes anfoesol.

"Yn hytrach, rydym yn cynnig set o egwyddorion craidd a fydd yn gymorth i ailadeiladu cysylltiadau economaidd mewn byd sy’n cael ei ysgogi fwyfwy gan drachwant, anghydraddoldeb, camddefnyddio adnoddau ac anghyfiawnder. Ymysg yr egwyddorion yma y mae cynaliadwyaeth, atebolrwydd, cydgefnogaeth a chyfiawnder cymdeithasol – egwyddorion sy’n adlewyrchu ein diddordeb yn lles cyffredin y ddynol ryw.

“Mae arweinyddion byd wedi ymroi i wella bywydau tlodion y byd. Am resymau sy’n ymwneud â chyfiawnder a hawliau dynol sylfaenol y mae’n hollbwysig nad ydym yn anghofio am y gwledydd sy’n datblygu ar yr union adeg pan y maent yn wynebu trafferthion economaidd dyrys a achoswyd gan ymddygiad anfoesol unigolion mewn gwledydd Gorllewinol.

“Rydym ni, Eglwys Bresbtyeraidd Cymru, yn gweddïo am lwyddiant y trafodaethau yr wythnos hon. Rydym yn falch o ymuno ag eraill o Brydain ac Iwerddon gan ddweud bod, ar sail ffydd, ffordd amgenach o ailstrwythuro economi’r byd.”