Mae Llywydd Eglwys Bresbyteraidd Cymru wedi galw am well dealltwriaeth rhwng eglwysi a chymdeithas yng ngwyneb y trafferthion economaidd a’r bygythiad terfysgol.

Yn ei neges Basg, mae’r Parchedig Haydn Thomas yn dweud bod y Pasg yn gyfle i Gristnogion godi ymwybyddiaeth o’r ffydd, er na fydd pawb yn barod i wrando ar y neges. Mae’n galw am fwy o gydymdeimlad tuag at waith eglwysi, yn ogystal â rhoi her bersonol i gyn-aelodau ddychwelyd i’r eglwysi.

“Rhaid i ni aelodau Eglwys lesu Grist fod yn sicr o'n ffydd a'n cred fel y gallwn argyhoeddi'r bobl o’n cwmpas,” meddai. “Mae'n sicr y cawn ein hanwybyddu gan lawer ond nid yw hynny yn esgus i ni beidio a rhannu'n cred ag eraill. Credaf fod yna filoedd sy'n chwilio am waredigaeth, tawelwch meddwl a heddwch. Mae hyn yn arbennig o wir yn ystod y cyfnod economaidd anodd hwn, sydd wedi achosi caletwch i deuluoedd lawer ac sydd wedi ein harwain i gwestiynu moesoldeb y farchnad a’r system economaidd bresennol.

“Ond rwy’n galw hefyd ar gymdeithas i gydnabod eglwysi, a pharchu lle a gwaith Eglwys lesu Grist. Mae cymunedau ffydd yn cyfrannu gwerth dros £100m o waith gwirfoddol i economi Cymru bob blwyddyn, heb sôn am gynnig porthiant ysbrydol a chymuned i ddegau o filoedd o bobl. Gobeithio y gall pawb weld bod eglwysi o bob math yn cynnig rhywbeth gwerthfawr i Gymru heddiw. Ac yng ngwyneb y bygythiadau a ddaw o gyfeiriad eithafwyr crefyddol, galwaf am oddefgarwch crefyddol a pharch i gredoau ein gilydd. Rhaid parchu cyd-ddyn pa beth bynnag yw ei dras, ei iaith, ei draddodiad a'i grefydd. 

“Ond beth am y rheiny sydd wedi troi cefn ar yr eglwys? Mae miloedd o bobl wedi eu magu mewn capel neu eglwys ond wedi troi cefn am wahanol resymau. Hoffwn estyn gwahoddiad a her bersonol i’r bobl yma: dewch yn ôl. Mae’r Eglwys eisiau eich dawn, eich talent a'ch gweledigaeth. Os ydych yn feirniadol o'r Eglwys a'i gwaith, dewch yn ôl a rhannwch eich gweledigaeth chi ar sut i wneud ein cenhadaeth yn fwy effeithiol.

“Felly dyma fy neges i Eglwys lesu Grist: byddwch yn ymwybodol o'r Pasg a'i neges a'i ystyr. Mae'r Ŵyl yn fwy na chael ychydig o ddyddiau yn rhydd: mae'n gyfle i ni sefyll dros yr hyn rydym yn ei gredu a'i gyhoeddi o'r newydd gyda'r argyhoeddiad y mae'n ei haeddu. Ac mae’n gyfle i ni weithio eto i ennill parch cymdeithas ac i adennill y rhai sydd wedi troi cefn ar yr Eglwys. Mae'n amlwg fod yna syched yn y byd am gariad, cyfiawnder a heddwch. Peidiwn â'i siomi.”