Mae The Treasury, cylchgrawn Saesneg misol Eglwys Bresbyteraidd Cymru, wedi cael gwedd newydd a gwefan newydd, diolch i'w dîm newydd o olygyddion.

Mae'r Parchedig Iain Hodgins a Miss Eleanor Jenkins o Benrhyn Gŵyr, ynghyd â'r Parchedig Jonathan Hodgins o'r Fenni, wedi eu penodi yn olygyddion wedi i'r Parchedig David Jenkins o Aberhonddu ymddeol o'r gadair wedi sawl blwyddyn o wasanaeth ffyddlon a diflino. Mae ganddynt amryw o syniadau ynglŷn â sut i fywiogi'r cylchgrawn.

“Dyma gyfle i uno a bywiogi aelodau ein Cyfundeb, ac i'w gwneud yn falch o fod yn rhan o rywbeth mwy na nhw eu hunain," meddai'r Parchedig Jonathan Hodgins.

“Rydym ni eisiau i'n haelodau ddarllen y Treasury yn awchus. Rydym eisiau iddyn nhw ei agor a chael eu calonogi gan y gwaith sy'n digwydd yn eglwysi EBC o amgylch y wlad. Rydym ni eisiau cyflwyno llyfrau ac adnoddau newydd fydd yn eu helpu ar eu taith ac yn eu gwaith. Rydym ni eisiau eu cyflwyno i arweinwyr Cristnogol y tu hwnt i'r enwad ac rydym ni eisiau herio eu agweddau fel eu bod yn meddwl am safle eu ffydd yng Nghymru heddiw,” ychwanegodd.

Bydd y wefan newydd, www.yourtreasury.co.uk yn cyhoeddi newyddion a llythyrau ychwanegol, yn ogystal â phigion o'r cylchgrawn. Gallwch hefyd lawrlwytho rhai o'r tudalennu o rifynnau diweddar ar ffurf PDF drwy glicio yma.

Beth am danysgrifio os ydych chi'n hoffi'r Treasury ar ei newydd wedd?