Dylid cyfyngu’r wythnos waith i 48 er mwyn amddiffyn gweithwyr, meddai arweinyddion Eglwys Bresbyteraidd Cymru mewn llythyr i’r Prif Weinidog.

Mae’r Eglwys wedi cymell y llywodraeth i gymeradwyo’r Gyfarwyddeb Oriau Gwaith Ewropeaidd.  Mae eithriad presennol y Deyrnas Unedig o’r Gyfarwyddeb o dan drafodaeth ddwys ar hyn o bryd, wedi i Aelodau Seneddol Ewropeaidd bleidleisio i ddileu’r eithriad ym mis Rhagfyr.  Byddai hyn yn golygu na chai gweithwyr Prydeinig weithio mwy na 48 awr yr wythnos ar gyfartaledd a byddent hawliau tebyg i weithwyr mewn rhannau eraill o Ewrop.  Ond mae llywodraeth y DU a Chyngor Gweinidogion Ewrop, sy’n cynnwys cynrychiolydd o lywodraeth y DU, yn gwrthwynebu y penderfyniad hwn.

Dywedodd y Parchedig Ifan Roberts, Ysgrifennydd Cyffredinol Eglwys Bresbyteraidd Cymru: “Mae cydbwysedd rhwng gwaith, teulu a bywyd cymdeithasol yn fater pwysig gan bod oriau hir yn y gwaith yn gallu cael effaith andwyol ar iechyd.  Byddai’r newid arfaethedig hefyd yn lleihau’r pwysau ar deuluoedd.  Yn ôl Cyngres yr Undebau Llafur, mae 460,000 o bobl yn y DU yn gweithio dros 60 awr yr wythnos: baich sydd yn beryglus ac sy’n golygu mwy na saith o ddyddiau wyth-awr yr wythnos. Nawr yw’r amser i ystyried newid arferion gweithio fel y bydd amodau gwaith yn gwella wrth i’r economi ddod allan o’r dirwasgiad.”

Galwodd Mervyn Phillips, Cadeirydd yr Adran Eglwys a Chymdeithas am i dydd Sul gael ei gydnabod yn swyddogol y Gyfarwyddeb fel y dydd gorffwys a ffefrir: “Mae Cynhadledd yr Eglwysi Ewropeaidd, sefydliad y mae Eglwys Bresbyteraidd Cymru yn aelod ohono, wedi arwain y ffordd wrth alw am well cydbwysedd rhwng gwaith a hamdden ac, fel rhan o hyn, mae wedi gofyn am i ddydd Sul gael ei gydnabod fel y dydd gorffwys a ffefrir.

“Ni fyddai hyn yn golygu bod pobman ar gau ar ddydd Sul, ond byddai dydd Sul yn cael cydnabyddiaeth arbennig.  O fewn yr eglwysi, mae dydd Sul yn ddiwrnod arbennig o fawl, gorffwys a hamdden, ond mae’n wir hefyd bod llawer o bobl sydd ddim yn dod i’r eglwys yn gweld pwysigrwydd diwylliannol a chymdeithasol cael dydd Sul fel diwrnod penodol o’r gwaith.  Tra na derbyniwyd y cynnig hwn gan Senedd Ewrop, mae’n fater y gofynnwyd i lywodraeth y DU edrych arno fel rhan o symudiad tuag at agwedd fwy ystyriol tuag at amodau gwaith.”