Mae'r gwaith o adeiladu hosbis newydd ar gyfer dioddefwyr HIV/Aids yn nhalaith Mizoram yng ngogledd-ddwyrain India wedi dechrau, a hynny diolch i arian a godwyd gan aelodau Eglwys Bresbyteraidd Cymru yn 2006.

Llywydd Synod Mizoram, y Parchedig H. Lalchhanhima,
yn gosod sylfaen yr hosbis newydd (25 Mawrth 2009)

Yn apêl Rhwymo'r Briw yn Rhwymo'r Efengyl, codwyd £35,000 er mwyn cefnogi rhaglen atal HIV/Aids Synod Mizoram. Er nad yw HIV/Aids yn broblem enfawr ym Mizoram, bwriad yr apêl oedd helpu i atal ymlediad yr afiechyd. Gwariwyd cyfran o'r arian ar anfon arbenigwyr o Gymru i helpu i weithredu'r strategaeth ac ar ymgyrch i godi ymwybyddiaeth. Bydd gweddill yr arian, yn ogystal â £25,000 o gronfa ganolog yr Eglwys, yn cael ei ddefnyddio i godi hosbis newydd yn Durtlang.

Mae'r sylfeini bellach wedi eu gosod ar gyfer hosbis Grace Home, a fydd yn cynnig gofal i'r rheiny sydd yn dioddef o HIV/Aids. Y gobaith yw y bydd yr hosbis newydd yn barod ymhen blwyddyn, pryd y bydd staff y Grace Home presennol, canolfan ofal gymuedol, yn symud i'w hadeilad newydd sbon.

Staff Grace Home o flaen yr adeilad presennol