“Defnyddiwch eich hawl democrataidd i bleidleisio” yw neges arweinyddion Eglwys Bresbyteraidd Cymru i bobl Cymru cyn yr etholiadau i’r Senedd Ewropeaidd a gynhelir yfory.

“Senedd Ewrop yw’r unig sefydliad Ewropeaidd sy’n cael ei ethol yn uniongyrchol a bydd y seneddwyr yn gwneud penderfyniadau pell-gyrhaeddol fydd yn ein heffeithio ni yng Nghymru, Ewrop a’r byd,” meddai’r Parchedig Haydn Thomas, Llywydd Eglwys Bresbyteraidd Cymru. “Mae gennym ni i gyd gyfle rŵan i godi materion yn ymwneud â’r amgylchedd, tlodi ac urddas cymdeithasol, allfudo ac amddiffyniad ffoaduriaid, heddwch a datblygiad.  Mae rhain yn faterion pwysig iawn i’r eglwys ac maent yn effeithio cymunedau cyfan.

“Mae Eglwys Bresbyteraidd Cymru, ynghyd â llawer o eglwysi Prydeinig eraill, yn aelod o Gynhadledd Eglwysi Ewrop (CEC), sydd wedi annog ei haelodau ar hyd a lled Ewrop i gwestiynu ymgeiswyr ac i bleidleisio, er mwyn sicrhau y gynrychiolaeth gryfaf bosibl i ofalu am bryderon ehangach yn ogystal â materion lleol, penodol.”