Mewn llythyr i'r Gweinidog Addysg, Jane Hutt AC, mae cynrychiolwyr Eglwys Bresbyteraidd Cymru wedi cefnogi argymhellion adroddiad yr Athro Robin Williams ar sefydlu Coleg Ffederal Cymraeg.

"Buom fel enwad yn pwyso’n gyson am ddarpariaeth o’r fath ers pum mlynedd, ac rydym wedi’n calonogi’n fawr o ddarllen adroddiad y Bwrdd Cynllunio," meddai'r Parchedig Glyn Tudwal Jones, Ysgrifennydd yr Adran Eglwys a Chymdeithas. "Cytunwn yn llwyr â galwad y Bwrdd i weld sefydlu’r Coleg Ffederal ym mis Medi 2010, ac iddo fod yn gwbl weithredol erbyn Medi 2011. "

Fe wnaeth Eglwys Bresbyteraidd Cymru gyflwyno sylwadau ysgrifenedig i'r Bwrdd yn ogystal â derbyn y gwahoddiad i fod yn bresennol yn y cyfarfod agored a gynhaliwyd ar ddiwedd tymor gwaith y Bwrdd.

"Er ein bod yn ymwybodol o’r cyfyngiadau ariannol dwys ar hyn o bryd ym myd Addysg Uwch yn gyffredinol, cytunwn fod y ‘chwistrelliad cyllidol graddol’ y mae’r Bwrdd yn galw amdano dros y deng mlynedd nesaf yn gwbl angenrheidiol a rhesymol," ychwanegodd y Parchg Jones. "Byddai'r buddiannau economaidd, diwylliannol a chymdeithasol yn sylweddol. Croesawn yr awgrym a wneir bod angen gwneud llawer i hybu datblygiad Addysg Uwch trwy gyfrwng y Gymraeg, a rhoi pob anogaeth i fyfyrwyr ddilyn eu cyrsiau drwodd o’r ysgol i’r brifysgol yn y Gymraeg."