Dylai llywodraeth Prydain dynnu ei milwyr allan o
Affganistan, yn ôl Llywydd Eglwys Bresbyteraidd Cymru.
Yn ei araith
ymadawol, galwodd y Parchedig Haydn Thomas
ar i Gordon Brown ddychwelyd at ei wreiddiau fel mab y mans, gan
seilio ei bolisi tramor ar egwyddorion Cristnogol.
“Ai rhyfel sy’n ennill dim byd ond gelynion yw’r ffordd fwyaf
effeithiol o rwystro cyflafan debyg i’r un yn Llundain bedair
blynedd yn ôl?”, holodd. “Mae’r byd wedi colli’r ffordd. Nid
ateb terfysgaeth gyda therfysgaeth yw’r ateb. Eisoes, mae
pedair gwaith yn fwy o filwyr Prydeinig wedi eu lladd yn
Affganistan nag a laddwyd ar y seithfed o Orffennaf. Rhaid
canfod ffordd wahanol: ailddarganfod diplomyddiaeth a chymod,
atgoffa’n hunain a’n gwleidyddion bod yna ffordd arall, sef
ffordd Crist.”
Ddydd Llun diwethaf, pleidleisiodd y Gymanfa Gyffredinol o blaid
pwyso ar Gordon Brown i dynnu’r milwyr allan o Affganistan.
Fe wnaeth y
Llywydd ddadlau bod y ffordd Gristnogol yn absennol mewn
materion economaidd hefyd: “Rydym wedi gweld yn glir sgil
effeithiau trachwant bancwyr: y wlad mewn dyled enfawr ond y
bancwyr yn parhau i ennill bonws enfawr. Mae ein blaenoriaethau
yn ffradach, ac mae hyn i’w weld ym mhobman, o gyflogau
pêl-droedwyr i guddio’r Groes mewn pennod o Coronation Street.”
“Mae gan ddirywiad yr Eglwys ran fawr i’w chwarae yn hyn i gyd.
Ond lle mae ewyllys mae yna ffordd. Rydw i am i ni Gristnogion
beidio ymddiheuro am ein gwendid, ond i ganolbwyntio yn hytrach
ar ailddarganfod sut i ddangos Crist i’r byd. Yn ein
gweithredoedd, ein geiriau ac hyd yn yn oed wrth bleidleisio
mewn etholiad, gallwn ddangos nad oes rhaid i drachwant a
therfysg ac anfoesoldeb fod yn rhannau annatod o’n cymdeithas.”
