Dim carchar i Gaernarfon yn ergyd i deuluoedd

Mae gwirfoddolwyr a gweithwyr asiantaeth Gristnogol ar gyfer cyn-garcharorion a’u teuluoedd wedi mynegi siom yn dilyn y newyddion na fydd carchar yn cael ei adeiladu yng Nghaernarfon wedi’r cwbl.

Mae BARA, asiantaeth Gristnogol a noddir gan Eglwys Bresbyteraidd Cymru, yn helpu cyn-droseddwyr ac yn cynnig rhwydwaith o gefnogaeth i deuluoedd carcharorion yng Nghaernarfon. 

“Mae’n ergyd,” meddai Mererid Mair, cyd-gordiwr BARA ygn Nghaernarfon a gweithwraig gymunedol yn Eglwys Noddfa ar Ystâd Sgubor Goch yn y dref. “Rydan ni’n cefnogi teuluoedd sydd â rhywun yn y carchar, a byddai cael carchar yma wedi gwneud pethau gymaint yn haws iddyn nhw. Mae’n wirion bod ‘na ddim carchar yng ngogledd Cymru. Ac mae’r ochr economaidd hefyd – rydan ni angen swyddi yng Nghaernarfon.” 

“Dweud y gwir, heddiw mae ‘na ddau wirfoddolwr efo BARA wedi gyrru’r holl ffordd lawr i Ben-y-Bont i weld aelod o’r teulu yng Ngharchar y Parc. Dydi o ddim wedi cael ymwelydd ers cyn ‘Dolig diwethaf, yn rhannol oherwydd ei bod hi’n hunlle’ trio mynd i lawr yno.”

Mae tua un o bob tri carcharor yng Ngharchar Altcourse, Lerpwl, yn dod yn wreiddiol o ogledd Cymru. Mae BARA yn helpu cyn-droseddwyr wrth iddynt geisio symud yn ôl i ogledd Cymru, gan gynnig cymorth gyda chanfod llety neu ddelio â phroblemau alcohol neu gyffuriau eraill, yn ogystal â rhoi anogaeth gyda gwaith, addysg a hamdden. Mae gwirfoddolwyr BARA hefyd yn cefnogi teuluoedd y troseddwyr wrth iddynt ddod i dermau ag absenoldeb gŵr, mab neu dad, ac yna yn eu helpu i addasu wedi iddo gael ei ryddhau. Fe’i noddir yn bennaf gan Eglwys Bresbyteraidd Cymru, ymysg eraill.

Gallwch ymweld â gwefan BARA drwy fynd i: www.bara.uk.net.