Mae cynrychiolwyr Eglwys Bresbyteraidd Cymru wedi croesawu adroddiad Confensiwn Cymru Gyfan.

Mae’r Gonfensiwn, a fu’n gyfrifol am gynnal dadl ar ddyfodol gwleidyddol Cymru, wedi cyhoeddi ei hadroddiad heddiw, gan argymell cynnal refferendwm ar bwerau deddfu llawn i Gymru.

Wedi cyflwyno tystiolaeth ysgrifenedig ac ar lafar i’r Gonfensiwn yn gynharach eleni, dywedodd Mervyn Phillips, Cadeirydd Adran Eglwys a Chymdeithas yr Eglwys, ei fod yn falch fod y Gonfensiwn wedi cymryd sylw o safbwyntiau’r Eglwys.

Yn lawnsiad cyhoeddus Adroddiad y Gonfensiwn yng Nghaerdydd heddiw, dywedodd Mr Phillips: “Mae Eglwys Bresbyteraidd Cymru yn croesawu’r adroddiad a’r ffordd y mae’n delio â’r materion a godwyd gennym.  Rydym yn croesawu’r farn ganolog bendant fod yn rhaid datrys y problemau gyda’r gyfundrefn bresennol, gan ddod â Chymru yn nes at y gyfundrefn Albanaidd.  Mae’r adroddiad yn dod i’r casgliad y gellid ennill refferendwm, ac mae hyn hefyd i’w groesawu.  Barn y Gonfensiwn yw fod angen gwneud mwy o waith i ddwyn perswâd ar rai rhannau o’r etholaeth, ac mae hefyd yn datgan y dylai’r adolygiad cyfansoddiadol fynd i’r afael â’r ffordd y mae gwasanaethau yn cael eu darparu mewn ffyrdd gwahanol ar draws ffiniau cenedlaethol.  Dylai datganoli ganiatáu i benderfyniadau llywodraethol gael eu gwneud yn nes at y bobl, ac mae’r cynigion yma yn gam pwysig ymlaen wrth wella’r broses yna yng Nghymru.”

Mae Eglwys Bresbyteraidd Cymru yn gefnogwr blaenllaw o ddatganoli yng Nghymru ers amser maith, meddiw Mr Phillips.

“Mae Eglwys Bresbyteraidd Cymru yn sefydliad Cymreig sydd ag eglwysi ledled Cymru a rôl bwysig yn hanes Cymru.  Rydym ni wedi dadlau o blaid datganoli ers amser maith gan ei bod yn bwysig cael cydnabyddiaeth wleidyddol o hunaniaeth, cymuned a hanes Cymru.  Rydym yn rhan o’r gymuned ac mae a wnelo hunaniaeth y gymuned yno â ni.  Mae cael gwaith y llywodraeth yn nes at y bobl yn gam hollbwysig ymlaen.”